Etsipenaren edo axolagabetasunaren ondorioz, Irlandak 'indioilar' bat eraman dezake Eurovision Jaialdira; izan ere, jaialdi hori duela hamabi urte irabazi zuen azken aldiz herrialdeak, zazpigarren garaipena lortu zuenean.

Eurovision irabazi ezinik urte askotxo eman dituztela iritzita, aurten gauza bereziren bat egitea erabaki eta Dustin indioilarra aurkeztu dute herrialdea ordezkatzeko hautagaien artean. Hautagai xelebre hori telebistako hainbat saiotan agertu den txotxongilo bat da, eta ospe handia lortu du horrela

Irelande, Douze Pointe (Irlanda, hamabi puntu, distortsionatutako ortografia frantsesean idatzitakoa) da txontxogiloaren kantak duen izenburua eta beste bost abestirekin batera irlandarren botuak bereganatzeko lehian ari da. Gainontzeko abeslariak gizaki arruntak dira.

Curriculum aberats eta zabal bat du alde Dustinek; izan ere, Errepublikako presidente izateko hautagai gisa aurkeztu izan da, Bob Geldof abeslari eta ekintzariarekin batera kanta bat grabatu du eta Leitrim konderriko kritikorik sutsuena da. Irlandako probintzi "ahaztua" da Leitrim, herrialde guztietan izaten da antzeko bat.

Maiatzean Belgraden izango den finalerdian ordezkari irlandarra zein den ezagutzeko hiru aste baino ez dira falta.