6,1 kiloko pisua eta 63 zentimetroko altuera duen ume bat jaio da Jabarovsk hirian, Errusiako ekialdean, amatasun-klinikako ordezkariak jakitera eman duenez.

"Ama eta jaioberria ongi daude", ziurtatu dio klinikako ordezkariak RIA-Novosti agentziari. Umea zesarearen bidez jaio da eta amaren seigarren semea da.

Oksana Yajinova ginekologoaren hitzetan, "azken zortzi urteetan mota honetako jaiotzarik ez da izan Jabarovsken". Azken jaioberri astunak 5,6 kiloko pisua izan zuela gaineratu du.

2007. urteko irailean, andre batek 7,75 kiloko alaba izan zuen Altaiko lurralde siberiarrean. Haurdunaldiaren 33. astean 2,5 kiloko pisua zuen fetuak.

Baina ama ez zen batere urduri jarri; izan ere, hamaika seme-alabetatik pisu gutxien izan zuenak 4 kilo baino gehiago izan zituen.

Jaioberririk pisutsuena 1955ean jaio zen Italian: 10,2 kilo zituen, Guinnes Errekor liburuaren arabera.