Susto ederra Air Canada konpainiaren hegaldi batean izan dutena. Hegazkina Torontotik (Kanada) abiatu zen, eta Londresko Heathrow aireportuan amaitu behar zuen bidaia, baina, azkenean, bidean geratu zen.

Hegazkinak larrialdiko lurreratzea egin behar izan zuen Shannonen (Irlanda), baina ez arazo teknikoak izan zituelako edo eguraldiak okerrera egin zuelako, baizik eta pilotuetako bat guztiz erotu egin zelako.

Eta nola ohartu ziren bidaiariak arazoaz? Hegazkina airean zegoenean pilotua kabinatik ateratzen ikusi zutelako, urduri-urduri eginda, eta Jainkoarekin hitz egin nahi zuela oihukatzen.

Air Canada konpainiak aitortu egin du pilotua ez zegoela lanean egoteko baldintza onetan, baina ez du zehaztu buruko arazorik duen. Artatzen ari direla baino ez dute jakinarazi.

Azkenean, bidaiariak zortzi ordu berandu heldu ziren Londresera, beste hegazkin batean eta, hori bai, pilotu guztiz sano batekin.