Ama batek zortzi urteko umea senar-emazte batzuekin utzi zuen, haiekin zuten zorra ordaindu bitartean. Aipatzekoa da zorra umearen aitak zuela, baina duela gutxi hil zela eta, ondorioz, amak egin behar izan ziola aurre.

Gertakariak duela hilabete batzuk hasi ziren Polonian, senarrak 100.000 zlotyko (28.000 euro inguru) zorra egin zuenean arestian aipatu senar-emazteekin. Hala ere, gizonak ezin izan zuen zor hori kitatu, hil egin zelako.

Hori dela eta, bikotea dirua eskatzen hasi zen alargunari, eta pasa den larunbatean emakumearen etxera joan ziren zorraren zenbatekoa igo egin zutela esateko. Beraien ustez, ordainketa gehiegi atzeratzen ari zen eta, beraz, zorra 70.000 eurora igotzea erabaki zuten.

Emakume zordunak, ordaindu beharreko izugarrizko kantitatea ikusita eta dirua biltzen zuen bitartean, semea entregatu zuen berme modura. Baina emakumea hurrengo egunean egindakoaz damutu egin zen eta Poliziarengana jo zuen xantai bat jasan zuela salatzeko.

Poliziak jarraian haurraren bilaketari ekin zion eta ostalari etxe batean aurkitu zuten. Mutikoa egoera onean topatu zuten, ongi zaintzen baitzuten.

Zorioneko amaiera izan zuen istorio honek, agenteek senar-emazte xantaiagileak eta umearekin etxean zegoen hogei urteko gaztea atxilotu zuten eta.