Denoi gertatzen zaigu, goizetan izarak itsasten zaizkigu eta kosta egiten zaigu ohetik altxatzea. Mexikoko ume batek, ordea, hitzez hitz hartu du kontua eta oheko egiturara kola indartsu batekin itsatsi da, antza, eskolara ez itzultzeko.

Adingabekoak estuasun batean jarri ditu Babes Zibileko eta Gurutze Berdeko medikuak, bera askatzen joan behar izan baitziren.

Guadalupe herriko (Nueva Leongo estatua, Mexiko iparraldean) 10 urteko mutikoak ez zuen eskola bueltatu nahi (Gabonetako oporren ostean, lehen eskola eguna zuten atzo ume mexikarrek) eta, kola indartsu bat hartuta, ohera itsatsi zen, Manuel Santiago Gurutze Berdeko bozeramaileak azaldu duenez.

Sandra Palacios Gonzalez mutikoaren ama saiatu zen lehendabizi umea askatzen, baina, alferrik. Ondoren, laguntza eskatu zien auzokideei. Hauek ere ezinean ibili ziren.

Babes Zibileko langileek disolbatzaile berezia erabili behar izan zuten eta, bi orduren buruan lortu zuten umea askatzea.

Atzo, bederen, haurra ez zen eskolara joan baina… gaur ezinbestean joan beharko du!