Alcides Moreno, Manhattango (New York) eraikin baten 47. solairuan kokatutako aldamiotik eroritako langile ekuadortarra, sendatzen ari da. Are gehiago, Morenok jadanik familiarekin hitz egiten du, Ospitale Presbiterianoko medikuek jakitera eman bezala. Era berean, Morenok berriro ibili ahal izatea espero dute medikuek.

Alcides eta haren anaia, Edgar, 47 pisuko altueran (167 metro) jarritako aldamio batetik erori ziren pasa den abenduaren 7an, eraikinaren leihoak garbitzen zihardutenean.

30 urteko Edgar berehala hil zen, baina Alcides ordutik dago Ospitale Presbiterianoaren zainketa intentsiboetako unitatean. Alcidesek gorputzaren hamar bat hezur hautsi zituen, besteak beste, zenbait saihets-hezur, ezker besoa eta zangoak. Garuna eta bizkarrezurra ere kaltetuak ditu. Guztiz sendatzeko urtebete behar izango duela aurreikusten dute medikuek.

Solow eraikinaren arduradunen aurkako eta Trachtel Groupen kontrako salaketa jarriko du Morenoren abokatuak, Joseph Ehrlichek. Aldamioak ezarri zituen enpresa da Trachtel Group.