Txakurra da gizonaren lagunik onena. Hala dio behintzat esaerak eta, antza, iritzi berekoa da Txinako irakasle erretiratu bat: 13.000 dolar (10.000 bat euro) xahutu berri ditu haren txakurrari merezi duen hileta emateko.

Lin abizena duen gizona bakarrik bizi zen emaztea hil zenetik (duela bost urte). Orain hiru hilabete, txakur bat topatu zuen kalean, animalia atzetik joan zitzaion eta bere lagunik onena bilakatu zen handik gutxira, New Pekin egunkariak kaleratu duenez.
 

"Azken urteetan izandako pozik handiena" eman omen zion txakurrak eta, hura hilda, merezitako hileta egin nahi izan zion. Chengdu (Sichuan probintzia txinarra) hiriko hilerrira jo zuen ospakizuna antolatzeko asmoz.

Hasieran txakur bati azken agurra emateko prest ez bazeuden ere, adineko gizonaren borondatea betetzea erabaki zuten azkenean hilerriko arduradunek. Agertu dutenez, gizonezkoa ez zen ezarritako prezioa "merkatzen saiatu ere egin". Hileta egin ostean, txakurraren gorpua Linek erabakitako lekuan hobiratuko dute eta zuhaitz bat landatuko dute, animaliaren omenez.