Haurrari bularra eman behar izan dion eledun bat, ezkonberriko jantziarekin bozkatu duten senar-emazteak eta ia zabaldu orduko hauteslekuak itxi dituzten herriak. Horiexek izan daitezke hauteskunde egun honen beste aurpegia: aurpegirik bitxiena. 

Durangoko hautesleku batean, Aimar semeari bularra ematen ibili da emakume bat goizean. Legez libre egon beharko balu ere, epaile batek mahaira joatera derrigortu du.

Beste batzuek zorte handiagoa izan dute. Bederatzi hilabeteko haurdunaldia osatzeko bi egunen faltan, egun osoan mahaian egoteko zorian egon da Josune. Ordezkoa zen eta, azkenean, etxera joan ahal izan da.
Haurrak eta haurdunak alde batera utzita, egunak irudi bitxi asko eskaini dizkigu: erdi galduta, meza aurretik botoa ematera joan diren mojak...

Baina ez hori bakarrik. Errioxako herri batean (Villaroya), 09:41ean itxita zegoen hauteslekua, herriko bederatzi biztanleek ordurako botoa emana baitzuten. Errekorra, halere, Salcedillon (Teruel) hobetu dute: zabaldu eta itxi, dena bat; herriko 5 biztanleak izan dira mahaikide.

Malagan, Humilladero herrian, bikote batek ezkonberri jantziarekin bozkatu du, artean lo egin gabe. "Aurrenekoak izan nahi genuen botoa ematen eta oheratzen baginen, okerragoa behar zuen. Parrandan eman dugu gaua eta lagunekin etorri gara bozkatzera", esan dute.

Ezohiko jantziak soinean izan ditu Juan Carlos Gambra. Monjea da bera eta Cartuja de Portacoeli (Valencia) santutegia itxi du egun batez hauteskundeetako mahaian izateko.

Aldarrikapen ukituak izan ditu, azkenik, bikote itsu batek gaurkoan egindakoak. Suedian egiten duten antzera bozkatu dute Salvak eta Erasek  (hautagaien zerrendak braille sisteman daude idatzita)  eta, hala, ez diote euren botoa inori jakinarazi behar izan.