Bideozaleen biktimekin kezkatutako emakume batek bikotekideen artean jolasteko proiektu teknologikoa asmatu du, eta badirudi atsegin handiak eman ditzakeen asmakizuna izan daitekeela, puntuak irabazteko eta jokoan aurrera egiteko taktika bestearen alde erogenoak laztantzea baita.

"Intimate Game Controllers" ez dute oraindik merkaturatu, Jennifer Chowdhury New Yorkeko Unibertsitateko Telekomunikazio Programako ikaslearen esperimentua besterik ez da eta, baina haren tesia da, behintzat.
 

Flashen programatutako bideojoko horren lizunkeria kontroletan datza: sei sentsoredun bularretakoa emakumearentzat eta beste seidun galtzontziloak, gizonarentzat, eta jokalarien arteko igurtziekin jartzen dira martxan.

Lehenengo maila "Zineman" deitzen da, eta bularretakoaren tiretako eta galtzontziloetako aldeetako sentsoreekin jolasten da, baina laztanak egiteko tokiak gero eta "beroagoak" dira bigarren mailara ("Lehen hitzordua") eta hirugarrenera ("Lehen musua") heldu ahala.

"Etxean jokatzeko da, eta ez taberna batean", ziurtatu du egileak. Gainera, joystick berezi hori era gozoan laztandu behar dela dio, beste modu batean eginez gero, jokalariak puntuak galduko dituelako.