Marc-Antoine Audette eta Sebastien Trudel Kanadako umoristek adarra ondo baino hobeto jo zioten Nicolas Sarkozy Frantziako presidente berriari. Justiziazale Mozorrotuak deitzen dute haien burua, eta Stephen Harper Kanadako lehen ministroaren izenean telefonoz deitu zioten, afari bitxi batera gonbidatzeko.

Jacques Chirac Frantziako presidente ohiari ere, ziri bera sartu zioten. Hauteskundeak irabazi bezain laster, Sarkozyri deitu eta Harper zela esan zion Justiziazaleetako batek, haren ahotsaren itxurak eginda. Horretan zebiltzan bitartean, milaka entzulek arreta handia jartzen zuten, Corus irrati kateak igorritako programa baten zati bat izan zelako txantxa guztia.

Hasierako formalitateak bete ondoren, zer moduz dabilen galdetzen dio Mozorrotuetako batek frantziar buruari. Ondo dagoela eta gauzak benetan ondo doazkiola erantzuten dio Sarkozyk. Zoriontzekoa dela hori erantzuten dio Kanadako lehen ministro faltsuak, eta haren emazteak ere, zorionak bidaltzen dizkiola gaineratu.

Pixkanaka Sarkozy bereganatzen doaz Audette eta Trudel, eta Kanadarekin oso harreman onak dituela eta herrialde horren lagun handia dela esaten die Frantziako presidenteak, Stephen Harperrekin hitz egiten ari delakoan.

Baina gauzarik onena azkenean dator. Bushekin batera, hirurok (Sarkozy, Harper eta Bush) lagunen arteko afaria egitea proposatu egiten diote presidente berriari, eta ikustekoa izan beharko zen ondoren Sarkozy sinesberari jarri zitzaion aurpegia, Memeloen Afari polita izango zela agindu ziotelako. Bromaz jabetuta, deia berehala moztu zuen Sarkozyk.