Pauso sendoak emanez doa aurrera Korrikaren 15. edizioa. Karrantzan abiatu zenetik bi egun eskas igaro diren honetan, atzerrira heldu da dagoeneko herri-lasterketa.

Herbeheretan esaterako, Onze Taal (Gure Hizkuntza) elkarteak eitb24.com-ek ingelesezko edizioan argitaratutako albistearen berri eman du bere webgunean. Oraingoz, hizkuntza gutxituei buruzko berriak agertzen diren sailean ikus daiteke Korrikaren inguruko aipamena.

Onze Taal elkartearen egoitza nagusia Hagan dago. 1931ko maiatzean sortu zuten (orain dela 75 urte baino gehiago!) eta hizkuntza gaiak jorratzen dituen aldizkari bat argitaratzen du. Aldizkari horrek, gainera, hartzaile kopuru zabala du, - 38.000 inguru -, Herbeheretan, Belgikan, Surinamen eta Antilletan.

Halaber, kongresuak antolatzen dituzte eta herritarrek neerlanderaren inguruan izan ditzaketen zalantzak argitzeko zerbitzua eskaintzen du. Hizkuntza hori 20 milioi lagun baino gehiagok erabiltzen dute.