Ba, bai. eitb24.com-en inozentada batek baino gehiagok "irentsi" du. Batek baino gehiagok sinetsi du Euskal Pilota Federazioak Nintendoren kontra salaketa jarri duela Wii kontsolaren ideia pilotariek entrenamendu birtualak egiteko erabiltzen duten simulagailutik plagiatzeagatik.

Federazioaren telefonoak ere bat egin zuen inozentadarekin. Eta ez zen prestatuta genuen bakarra.

Inozenteen Egunean bertan Juan Antonio Compañon Pilota Federazioko idazkari teknikoak Radio Euskadin azaldu zuenez, lagun batek baino gehiagok eta komunikabide ezberdinek deitu zuten federaziora berria benetakoa zen edo ez egiaztatzeko.

Gainera, goizean telefono-deiak pertsona batek erantzuten zituen, baina arratsaldean ingelesez hitz egiten zuen erantzungailu automatiko batek! Inozentada bat ote zen galdetu genion "Konpa"ri, baina ezetz esan zigun. Antza, erantzungailua hondatu egin zitzaien eta ingelesezko mezua berez ateratzen zen. Eskerrak Nintendokoek ez zutela deitu!


Gehiago genituen


eitb24.com-eko inozentada bezperan hasi ginen lantzen. Asmatutako berriekin bozketa egin eta Wii kontsolarena aukeratu genuen. Hona hemen gainerako aukerak:


EDARI ETA JAKI BERRIA
Polonio kubatak eta Anisakis bokatak asmatu dituzte


Springfieldeko (AEB) Unibertsitateak egindako ikerketen arabera, bi sustantziak nahastuta "sexu-estimuluak areagotzen dira, larruazala leuntzen da eta sabeleko koipeak murrizten dira".

--

EKIMEN AITZINDARIA
Bainuetxea eraikiko dute Arantzazun, bake-prozesua sendotzeko

Frantziskotarrek uste dute ez dagoela gorputza eta arima lasaitzea baino hoberik adostasuna lortzeko. Gainera, elkarrizketak egiteko mahai ezberdinak erabiliko dituzte gosarian, bazkarian, askarian eta afarian.

--

ANTZINEKO OHITUREI BUELTA
Euroaren porrota ikusita, pezeta eta frankoa itzuli egingo dira

Urtarrilaren 1etik aurrera, banketxeek euro guztiak desagerrarazi egin beharko dituzte, eta hilabete horretako 31tik aurrera ez dituzte dendetan ere ez onartuko.

Eta zuk, zein duzu gustukoen?